Ar Ezmoce M3xade Diyu

Gobikta do ek'ebi3'eda ar umiteli ora kogomaşinen. Lazuri nena te na bisinapare miti va miyonurt'u. Almanuri dobigurişi nana-nena Lazuri ti muşi şeni ar nena na oren koxobo3'oni dort'u.

'Va mç'ara na gomoç'ondrasen ' na bit'urt'i, mamgurale na bort'i him 3'anape. Him şk'urinate Almanuri Universitepeşa olvoni na biyi, Almani Xocapeşe Korturi Alboni na dobiguri 3'ana 1983 i ort'u. Tblissi na gami?es Lazuri Nç'arelepe golaonu şeni Korturi Alboni na dobiguri ora.

Ar 3'ana şik'ule Wolfgang Feurstein Xoca biçinisi Lazuri Alfabeşi tasla?i himuşa komaz'iru. Fexri Mtanebiva elaçama yoxote, Arkabi na sk'udun Fahri Kahramani, W. Feursteini Xocaşa biçini. 3'ana 1984 i, ot2axu ora ort'u.

Lazuri onç'aru him ora mobiç'i. Himora şik'ule Lazuri Alfabete, nana-nena nç'areri ar jenerasyoni komirdu. Artioni Parola şk'uni 'Lazuri Nena va ?urasen' ort'u. Ham ar do3'ulva dulya var ort'u:

Şk'u Lazepe şeni, nana-nenate onç'arute na moyiç'u ezmoce st'eri ar ora kodogutu. Elankaleri guri şk'uni, mutu memiz'unan eşk'ampayitu. M3ika m3ika komebç'aritu do haşote ar a?ani Lazuri Mç'araloba kok'omasvares.

Şk'imi şeni ti na golilu 3'anape, Lazuri Nena do Kultura şeni onç'aru do mez'monute golaxt'u. Ar k'ale çainat'işi dulyape ek'eba3'ip'oli, manjura k'ale mez'moneri.Onç'aru ç'ami domyu. Gurişi çilambri gomakosu, Lazuri nç'areri.

?rote 'ar nd?a Lazuri berepeşi muelim dobiyik'o' ma ptkvi.

Huy, Kadiçoyi elabxer do, Lazuri doguru şeni na ok'ik'orobu mamguralepe nena şk'uni doboguram. Ham didepe nişi Lazuri na va dvoguru, Universite zit'eri mamguralepe şk'ala ma ti dobiguram. Lazuri Grameri do na va mişk'un mteli a?ani mç'araloba.

Şk'imi şeni ar ezmoce m3xade diyu !

?ormot'i ham nd?alepe komo3'iru: Lazi berepeşi muelimi biyik'o na bit'urt'i.
Lazi tişinerepeşi muelimi dom3'opxu Lazuri Kulturaşi Noderi.

Dido xeleri bore!

Ham xela do k'aobate, onç'aru ti momanz'inasen. Na go3'obidvi dulyape goşk'asxunu komobiç'i. Ar peleri ora kodogutu şk'imi şeni do mteli Lazona şeni.
Ar nd?a, Lazuri onç'aru dobogura dei, mteli Lazona golvoni biyare, komişk'un.


Aşk'va berepe kelemardu. Nç'arape gami?es, gami?aman. Lazuri Derne?epe gon3'es do golaxt'inuşi Nena do Kultura şeni dulya ikuman. Karti karti guri cut'inaman, işk'idenan. Xolo ti ma ç'umani şeni şvena va momikvates.

Elankaleri guri şk'imi kodoxedu. Muç'o gi3vat; K'adiçoyi gobit'aşa
Lazuri birapa bognam, guri emampen. Soti bida Lazuri berepe gosvareri.

Huy ma mi mi3'vaset'u, hust'eraşa ejdoviti 3'ana ogine, hast'eri nd?alepeşa na mebuxondat'u. Xolo ti baxve3'er ?ormot'i, mondo cipaşas m3xade na iyu ham mcveşi ezmoce şk'uni:

Berepe şk'uni na moyirden mektebepe ti, ar nd?a Nana-Nena Lazurite bozit'apatu. Haşote p'anda sk'udas oropaşi nena Lazuri.

Hayde şk'uni Lazepe,

Noderi mi?unan onç'aruşi,
Hayde Lazuri Mektebişa !

Selma Koçiva

21 Ap'rili 2011, P'oli /K'adiçoyi